SAKAMENA NEWS

OPINI KHUSUS 100 HARI KERJA HL-AV | KAJIAN DARI HATI MALUKU

MALUKU TANAH AIR-KU

Balayar di Tengah Badai, Susah Paskali, Tapi Harus Jalan!

✍️ Redaksi SAKAMENA News | Edisi Bahasa Ambon – Juni 2025

“Maluku Tanah Air-Ku”… akang nyata gandong, nyanyian hati, seruan tanah ini yang su lama tunggu keadilan. Katong memang masih maraya, tapi harapan itu masih ada. Ini Katong pung tanah air, Katong yang ator.

I. Jang Biking Sabarang par Maluku

Maluku ini bukan provinsi sabarang. Maluku ini tanah rempah, tanah sejarah, tanah di mana dunia dolo datang bertamu dan makang di katong. Tapi sayang, sampe skarang, Dong di pusat liat Maluku masih deng sabala mata. Pemerintah pusat kadang liat katong kaya ‘mai-mai ujang’ saja, seng talalu penting, bukan bagian penting dari jantung bangsa.

Kalau cuma program dari pusat yang dong ada biking banya disini, trus dong kase turun ka Maluku tanpa liat kondisi katong pung gunung tanah deng lautan, Ya Sio! dong pung model sama “andarinyo colo panta” jang harap katong bisa maju. dong ambe akang pung kepeng saja. Sadar jua, Basudara!  Maluku ini musti dibangun dari laut, dari kampong, dari budaya deng Katong pung aturan adat sandiri.

II. HL–AV Datang pas “Angin Timur” Kancang

Pas HL–AV jadi gubernur deng wakil gubernur, dong dua bukang langsung dapa rumah Gaga, dong dua dapa walang yang su bocor. Baru ada Utang sakali tu, Rp700 miliar e, seng gampang! birokrasi pono deng kepentingan, ada kaco di seram, ada kaco di Maluku Tengah, banya hal yang dong musti kasi selesai pas baru jadi Kapala.

Tapi dong seng bicara banya. dong mulai dari dasar. Bangun fondasi ulang deng uang saki-saki, tapi dong tetap karja saja.

III. Tujuh Program Utama (Sapta Cipta Lawamena / Hitu Cipta Lawamena):

1. Naikkan mutu pendidikan, kesehatan, deng kase masyarakat hidup bae-bae.

2. Jaga pangan deng energi biar cukup, juga atasi masalah orang seng kerja (pengangguran).

3. Biking nyata hak-hak par masyarakat, apalagi par parampuang, anak-anak, opa oma, deng orang-oranv cacat.

4. Kas nae kualitas jalan, jambatang, deng sarana laeng, supaya pulau-pulau bisa tasambung sambung bae.

5. Jaga lingkungan hidup deng cara yang neces, deng tangani perubahan iklim supaya Maluku tahang bencana.

6. Dongkrak ekonomi kreatif, keku kasi nae hasil usaha, deng percepat pengembangan ekonomi laut (maritim).

7. Tata pemerintahan yang barsih, adil, melayani masyarakat, pake teknologi baru yang canggih.

IV. Hal-Hal Nyata yang dong su karja

🔹 Reformasi Birokrasi: Samua jabatan penting sakarang dong biking pake seleksi terbuka. yang mau jadi Kapala dinas musti tes, yang lulus deng kualitas baru bisa jadi, Seng pake orang dalam, seng ada titip-titp nama.

🔹 Ekonomi: Maluku tumbuh 5,07% padahal kalo secara nasional, Indonesia cuma 4,87%. Itu artinya program padat karya deng bantu petani nelayan mulai su mulai jalan dari program-program yang dong dua biking

🔹 Infrastruktur: Di SBT, jambatang-jambatang yang dolo rusak, sakarang dong su mulai perbaiki par masyarakat yang selama ini jalan kaki lewat kali pas air meti, oto deng motor su bisa lewat bae-bae.

🔹 Kesehatan & Pendidikan: Dong buka karjasama Deng internasional, Dokter-dokter muda dari universitas mulai turun ka kampong-kampong, Ada juga program digital untuk bantu orang sakit di pulau-pulau, Ahli-ahli dari Internasional datang par biking program di Maluku, Supaya Katong pung anak-anak jua bisa lebe pintar lai.

🔹 Laut dan Lingkungan: Karja sama dengan MSC untuk jaga Katong pung laut. Karena laut bukan tempat par buang sampah, tapi Katong pung sumber kehidupan. HL-AV perjuangakan Laut Maluku sampe di jakarta, Bataria par dewan-dewan Deng menteri supaya bage hasil laut par Katong tu yang adil, Jang karna atoran yang cuma mau kasi untung pusat.

Ini Baru 100 hari, seng banya, tapi su mulai dapa lia Maluku pung bae,

V. “Maluku Tanah Air-ku”:, akang harus Jadi Nyata Gandong…

Kalo bilang “Maluku Tanah Airku” itu gampang. Tapi bikin akang jadi nyata, itu yang susah. HL–AV dong mulai biking, seng cari top, tapi dong bangun kepercayaan par katong. Maluku ini harus jadi pusat, bukang cuma pelengkap. Harus jadi pusat budaya maritim Indonesia.

VI. Beta Jujur: Dong dua seng sempurna, Tapi dong dua su ada di Mata Jalang.

Beta seng bilang HL–AV sempurna. Tapi minimal, dong dua pung niat. Dong dua karja tapi seng mau talalu cari perhatian, tapi dapa lia nyata. tagal itu, kasi tinggal dong biking dolo, Jang biking Aer kabor deng tinggal kas jato dong dua di media sosial. Jang gandong. Karna dong juga manusia sama, ada pung salah juga.

Akhir Kata: “Maluku Tanah Air-Ku” Harus Katong Karja akang sama-sama, supaya par samua pung Bae.

Beta rasa, skarang ini, katong pung pemimpin su pas, yang betul-betul berani bilang “seng” par sistem lama. Yang lebih pilih seleksi murni dari pada suap. Yang lebih pilih karja daripada pencitraan.

“Maluku Tanah Air-ku” bukan cuma syair. Itu sumpah. Itu tanggung jawab. Dan HL–AV su kas jalan akang. Palang tapi pasti. biar ada badai, dong tetap bangun fondasi.” Par Maluku pung Bae…

🖋 Redaksi SAKAMENA NEWS 📩 Tanya–jawab atau kirim opini: sakamenamuria50@gmail.com

Penulis : Weyber Pagaya,SH

Editor : Tim Redaksi Sakamena News