BETA PATTIMURA

Puisi Spesial Hari Pattimura yang ke 208

Oleh: Rudi Fofid
BETA PATTIMURA

Beta mati tagantong di tali victoria
Beta masih hidop leher tagepe di tali republik

kabaresi kabal besi leher baja
tapi sangsara susah lawang

merah berang di kepala merah darah kapitan
merah pula seluruh amarah

nenek moyang dapa gepe atorang orang kompeni
katorang dapa ramas atorang orang republik ampadal

beta saksi kaki tempang di depan idong tinggi
beta saksi kaki patah di depan idong panoso

beta pattimura kapala mahal gulden-gulden
beta pattimura jiwa raga murah rupiah-rupiah

dong bilang tanpa maluku bukan indonesia!
sio, parlente! gula saparua lebih manis

dong bilang gugur sebagai bunga cengkih
sio, kewel! anyer ikan haria lebe wangi

beta pattimura, goyang kapala
di hadapan tuan-tuan pamabo di batavia

ya, mabo emas biru Maluku
minum sambil cubi-cubi udang arafura

Hari Pattimura, 15 Mei 2025

Penulis : Rudi Fofid

Editor : Tim Redaksi Sakamena News